|
||||||||
|
||
TINIYAK ni Chief Public Attorney Persida Rueda-Acosta na tutulong ang kanyang tanggapan upang mabawasan ang mga nabibilanggo sa iba't ibang piitan sa buong bansa. Ipinaliwanag ni Atty. Acosta na karaniwan nilang ginagawa ang pagdalaw sa mga piitan dala ang mga manggagamot, mga dentista at mga abogado upang alamin ang kalagayan ng mga napipiit.
NAKIKIPAG-USAP si Chief Public Attorney Persida V. Rueda-Acosta sa mga bilanggo ng National Bilibid Prison kaninang umaga. Layunin nilang mabawasan ang mga piitan sa pamamagitan ng pagsusuri sa mga papeles at iba pang record. Libu-libo na ring bilanggo ang kanilang napalaya mula ng simulan ang pagdalaw sa mga piitan noong 2007
Sa panayam kaninang umaga sa National Bilibid Prison, sinabi ni Atty. Acosta na noon pang 2007 na nila sinimulan ang pagdalaw sa mga bilangguan. Prayoridad nila ang alamin ang kalagayan ng mga political prisoner mula pa noong panahon ni Pangulong Ferdinand E. Marcos hanggang noong nakalipas na administrasyon ni Pangulong Gloria Macapagal-Arroyo.
Mahalaga ang palatuntunan upang mabawasan ang mga bilanggo. Kailangan umano ang computerized inmate tracking system upang medaling maayos ang papeles upang mapalaya sila sa takdang panahon. Mayroon umanong 2,000 bilanggo na klarado na ang takdang petsa kung kailan matatapos ang hatol at kung ilan ang good conduct time allowance na dapat ibawas sa kanilang sentensya upang hindi matagalan ang pagpapalaya sa kanila.
Binanggit din ni Atty. Acosta na noong nakalipas na taon, umabot sa 78% ang usaping kanilang naipagwagi sa iba't ibang hukuman sa buong bansa. Mayroon silang 600,000 mga usaping kriminal at sibil na hinahawakan sa buong Pilipinas. Walang tiyak na takdang panahon kung kailan matatapos ang usaping nasa hukuman sapagkay mayroong tumatagal ng isa hanggang tatlong buwan at mayroon namang nagbibilang ng taon.
© China Radio International.CRI. All Rights Reserved. 16A Shijingshan Road, Beijing, China. 100040 |