Human rights watch nanawagan sa pamahalaang Pilipino:buwagin ang private armies

MULA sa New York, nanawagan ang Human Rights Watch sa pamahalaan ng Pilipinas na isabay na sa bubuwaging mga armadong grupo ang paramilitary units na suportado ng gobyerno.

Nauna nang nangako ang pamahalaang bubuwagin ang private armies bago pa man pumasok ang election season sa taong 2013.

Ayon sa Human Rights Watch, dapat ipagbawal ni Pangulong Benigno Simeon C. Aquino III ang lahat ng paramilitary units sa Pilipinas. Ang paramilitary units ang bahagi ng private army ng Pamilya Ampatuan na may kinalaman sa pagkasawi ng 58 katao sa Maguindanao. Karamihan sa mga napaslang ay mga mamamahayag. Ang mga pag-abuso ng paramilitary units ay bihirang siyasatin o litisin kaya't nagkakaroon ng climate of impunity na nagiging dahilan ng higit na paglabag sa batas.

Kapuri-puri ang desisyon ni Pangulong Aquino na uwagin ang mga private army upang matapos ang kaguluhan sa bansa subalit dapat ding isama ang paramilitary forces na abusado rin.

Noong Miyerkoles, sinabi ng Philippine National Police na nabuwag na nila ang 28 private armed groups at nadakip din ang may 106 na suspect. Mayroon umanong talaan ng mga grupong ito ay mayroon pang 86 na nalalabi. Nanawagan ang Human Rights Watch sa pulisya na ilabas ang talaan ng mga private armies at ipaliwaag ang mga hakbang na ginawa upang matapos na ang pananalanta ng mga armadong grupong ito.

Karaniwang madugo ang mga halalan sa Pilipinas dahilan sa magkakalabang grupo na suportado ng mga private army at mga paramilitary units.

Kinabibilangan ang mga grupong ito ng Civilian Armed Force Geographical Units o CAFGU, ang Special CAFGU Active Auxiliary, Civilian Volunteer Organizations at Police Auxiliary Units.