Pilipino, nasawi sa pagsabog sa Saudi Arabia

ISANG manggagawang Pilipino ang nasawi sa pagsabog ng isang truck ng gasolina sa Saudi Arabia. Nakilala ang tsuper ng nasawi sa pangalang Florentino Santiago sa pamamagitan ng kanyang bayaw.

Ayon kay Assistant Secretary Raul Hernandez, tagapagsalita ng Kagawaran ng Ugnayang Panglabas, dinala na ang labi ng yumaong tsuper sa Riyadh Central Mortuary sa Shumeisy Hospital. Sampung iba pang mga Pilipinong nasugatan sa pagsabog ang ginagamot sa apat na magkakahiwalay na ospital.

Nagbabantay ang mga tauhan ng Embahada ng Pilipinas sa mga naging biktima at may pakikipag-ugnayan sa kanilang mga pinaglilingkuran upang matiyak na ang kahat ng tulong at pangangalaga ay maibigay sa kanila. May pakikipag-ugnayan na rin ang mga tauhan ng embahada sa ilalim ni Ambassador Ezzedin Tago sa mga pinaglilingkuran ni Ginoong Santiago at sa kanyang mga kamag-anak sa Pilipinas upang maayos ang pag-uuwi sa kanyang labi.

Ayon sa datos ng pamahalaan at simbahan, karamihan ng mga manggagawang Pilipino ay nasa Gitnang Silangan at pinakamarami ang nasa Saudi Arabia.

Payapa ang pagdiriwang ng todos Los Santos

WALANG anumang malalaking insidenteng naganap sa buong bansa sa pagdiriwang ng Todos Los Santos kahapon. Ayon kay Col. Arnulfo Marcelino Burgos, taga-pagsalita ng Sandatahang Lakas ng Pilipinas, matagal na pinagbalakan at pinaghandaan ng mga ahensyang sangkot sa pagpapanatili ng kapayapaan ang okasyong ito. Nakatulong din ng malaki ang mga pamahalaang lokal sa pagpapanatili ng maayos na pagdiriwang kahapon. Ang intelligence units ng Sandatahang Lakas ng Pilipinas ay patuloy na nagbabantay sa anumang magaganap, partikular sa kanayunan, matiyak lamang ang payapang pagdiriwang ngayon ng All Souls Day.

POLICE CHIEF NICANOR BARTOLOME, GINUNITA ANG MGA BAYANING PULIS.  Nag-alay ng mga bulaklak at kandila si Police Director General Nicanor Bartolome sa mga nasawing pulis samantalang naglilingkod sa bayan.  Ginawa ang pag-aalay na ito sa memorial na itinayo sa loob ng Campo Crame

Sa panig naman ng Philippine National Police, sinabi ni Chief Supt. Generoso Cerbo, tagapagsalita ng tanggapan, na pawang minor incidents lamang ang kanilang naitala sa buong bansa. Nagkaroon ng apat na hiwa-hiwalay na sakuna na ikinasugat ng 13 katao. Wala namang nai-ulat na nasawi sa mga sakunang ito sa Gitnang Luzon at Timog Katagalugan.

PAYAPA ANG PAGDIRIWANG NG TODOS LOS SANTOS.  Ito ang ibinalita ni Col. Arnulfo Marcelino Burgos, tagapagsalita ng Armed Forces of the Philippines kasunod ng mga ulat na natanggap mula sa buong kapuluan.  Pinasalamatan niya ang lahat ng law enforcement agencies at local government units sa pagtiyak na payapa ang okasyon kahapon.

Dalubhasa ng United Nations sa human trafficking, dadalaw sa Pilipinas

SA kanyang unang pagdalaw sa Pilipinas sa Lunes, ika-lima ng Nobyembre, susuriin ni Joy Ngozi Ezeilo, ang United Nations Special Rapporteur ang kalagayan ng mga Pilipinong nabiktima ng human trafficking.

Nais umano niyang mapakinggan at matutuhan ang mga pananaw ng mga naging biktima at iba pang stakeholders upang matiyak ang pagkakaroon ng human rights-based approach upang masugpo ang trafficking-in-persons. Si Ezeilo ang hinirang ng UN Human Rights Council na magsulong ng mga paraan upang mapigilan ang trafficking persons kasabay ng pagkakaroon ng kaukulang hakbang upang ipagtanggol karapatang pangtao ng mga biktima.

Umaasa rin si Bb. Ezeilo na makakausap ang mga kinatawan ng pamahalaan at iba pang mga autoridad tungkol sa mga nagawa na at mga binabalak pang gawin upang masugpo ang human trafficking.

Sa kanyang limang-araw na pagdalaw, magtutungo rin siya sa Zamboanga upang makausap ang mga kinatawan ng pamahalaan at hudikatura, mga biktima ng human trafficking at mga kasapi ng international at civil society organizations.