PUNONG-PUNO ang schedule ni Japanese Prime Minister Shinzo Abe sa kanyang dalawang araw na pagdalaw sa Maynila. Nakatakda siyang dumating mag-iika-siyam ng gabi sa NAIA Terminal 2 at tutuloy sa Presidential Lounge. Pagsapit ng ika-siyam at kalahati ng gabi, haharap naman siya sa 35th Philippines Japan Friendship Celebration Awards Night na pamumunuan ng Philippines – Japan Society sa Hotel Intercontinental Manila sa Makati City.
Bukas sa ganap na ika-siyam at kalahati ng umaga, mag-aaalay siya ng bulaklak sa bantayog ni Gat Jose Rizal sa Luneta. Magkakaroon naman ng Welcome Ceremony at paglagda sa Guestbook ng Malacanang sa ganap na ika-sampu ng umaga.
Pagkatapos nito, dadalaw naman siya sa tanggapan ni Pangulong Benigno Simeon C. Aquino III at magtatagal ng hanggang bago sumapit ang ika-labing isa ng umaga. Susundan ito ang Expanded Bilateral Meeting hanggang ika-labing isa at kalahati ng umaga.
Haharap naman si Pangulong Aquino at Prime Minister Abe sa mga taga-media para sa kanilang joint press statements at susundan ng isang pananghalian sa karangalan ng panauhin at magtatagal ng hanggang ala-una kwarenta ng hapon.
Haharap sa mga mamamahayag si Prime Minister Abe sa ganap na ikadalawa at apatnapu ng hapon sa Rigodon Ballroom ng Manila Peninsula Hotel.
Nakatakdang umalis si Prime Minister Abe sa NAIA Terminal 2 sa ganap na ika- 4:45 ng hapon.
1 2 3 4 5 
