|
||||||||
|
||
melo20130926
|
SINABI ni Senador Jinggoy Estrada na hindi makatarungan ang ginawa sa kanilang tatlo nina Senador Juan Ponce Enrile at Ramon Revilla, Jr. ng idiin sila sa diumano'y paglustay ng salapi ng bayan sa pamamagitan ng kanila Priority Development Assistance Fund.
Sa kanyang privilege speech na tumagal ng may isang oras kahapon, sinabi niyang "Selective justice is injustice" sapagkat sa may 371 mambabatas na mayroon umanong irregularities sa PDAF ayon sa Commission on Audit special report, ay tanging sila lamang ang pinag-iinitan.
Ayon sa mga nagmamasid, ang talumpati ay pagtatangka ni G. Estrada na maging patas ang tingin ng publiko sa kanilang mga mambabatas. Binanggit pa ni Senador Estrada na mayroong mga mambabatas na kumita sa pamamagitan ng mga suhol at karagdagang regalo mula sa Ehekutibo (Malacanang).
Dagdag pa ni Senador Estrada tatatlong ahensya pa lamang at lilimang lalawigan ang isinailalim ng pagsisiyasat. Mas makabubuti umanong lahatin na ang imbestigasyon upang lumabas ang katotohanan. Ginamit din umano ang PDAF upang mapatalsik si Ombudsman Merceditas Gutierrez at Chief Justice Renato Corona. Nagamit din ang PDAF sa pagpapasa ng Reproductive Health bill kamakailan.
Pinaringgan din ni Senador Estrada si Senate President Franklin Drilon na pasimuno umano ng pamamahagi ng P 50 milyon sa bawat senador na bumuto upang mapatalsik si Chief Justice Corona. Hindi umano magagawa ni Senador Drilon, na noo'y Senate Finance Committee chairman, kung walang salaping nagmumula sa tanggapan ni Secretary Florencio Abad ng Department of Budget and Management.
Niliwanag naman ni Senador Estrada na bumoto siya upang mapatalsik si CJ Corona ng walang anumang tinanggap, hiniling at ninais mula sa administrasyon kahit pa may kumausap sa kanyang patalsikin na si G. Corona.
© China Radio International.CRI. All Rights Reserved. 16A Shijingshan Road, Beijing, China. 100040 |