SINABI ni Pangulong Benigno Simeon C. Aquino III na patuloy ang pagbabagong nagaganap sa Pilipinas. Ito ang binigyang-diin ni Ginoong Aquino sa kanyang talumpati sa harap ng Korean business community.
Bukod sa walang humpay na kampanya laban sa katiwalian at pagpapanagot sa mga pinaniniwalaang nagkasala, patuloy ang pagpapakilos sa pamahalaan upang pakinabangan ng madla.
Ang matatagumpay ng mga mangangalakal ay may kakayahang humarap sa mga peligro. Ani Pangulong Aquino, ang corruption ay isang hindi nakikita at hindi basta masusugpong situwasyon. Upang matamo ang paglago ng ekonomiya, nararapat mapigil ang corruption. Nadarama na ang pagbabawas ng red tape at naisasaayos na ang burukrasya. Ngayon ay naitayo na ang Philippine Business Registry, isang one-stop shop para sa mga kailangang dokumento para sa kalakal.
Ibinalita ni Pangulong Aquino na epektibo na ang national budget sapagkat natugunan na ang pangangailangan sa mga silid-aralan mula sa 66,800 noong 2010, mawawala na ang kakulangang ito ngayong 2013. Ipinagmalaki pa niya ang K-to-12 program para sa mga kabataan. Ani Pangulong Aquino, noong nakalipas na panahon ay 66% lamang ng mga kabataan ang nasa paaralan, ngayon ay umaabot na sa 84%, na ang karamiha'y mula sa mga liblib na pook.
Nakita na umano ng daigdig ang pagbabago sa Pilipinas. Sa World Economic Forum, mula sa ika-85 ay natamo na ng Pilipinas ang ika-59. Makikita rin ang pagbabago sa Pilipinas sa pamamagitan ng mga credit ratings agencies na nagbigay ng investment grade kamakailan. Mula sa ika-134 sa Transparency International, narating ng Pilipinas ang ika-105 puesto ngayong 2013. Ang GDP growth rate ng Pilipinas mga sampung taon bago naluklok ang Aquino Administration ay 4.7% at narating na ang 6.3% sa nakalipas na tatlong taon at humigit sa 7% sa nakalipas na apat na quarter.
1 2 3 4 5 6
