|
||||||||
|
||
meloblog
|
ISANG buwan matapos manalasa si "Yolanda" sa Central Philippines ay napupuna na ang pagbabago sa pagbubukas na muli ng paliparan, pagkakaroon ng gasolina at krudo, may tubig na dumadaloy sa mga tubo at nakatatanggap na ng pagkain ang mga biktima. Ito ang sinabi ni Luiza Carvalho, ang Resident at Humanitarian Coordinator sa Pilipinas na dumalaw kahapon sa Tacloban City.
Ang United Nations at mga kabalikat na ahensya ay nakapaglingkod na sa may tatlong milyong mamamayan sa pamamagitan ng mga pagkaing ipinamahagi. Higit na rin sa 20,000 pamilya ang nakatanggap na binhi na itatanim sa kanilang mga palayan. Sa susunod na anim na buwan, higit sa 100,000 mga kabataan hanggang dalawang taong gulang at mga nagdadalang-tao at mga bagong ina ang tutulungan sa pamamagitan ng feeding programs.
Mayroong 25 medical teams na naglingkod sa 25 mga bayan at may mga palatuntunang inilunsad upang ipatupad ang cash-for-work upang mapasiglang-muli ang ekonomiya. Prayoridad pa rin nila ang pabahay at pagkakakitaan upang mabalik sa normal ang buhay ng mga biktima. Kailangan ng apat na milyong pirasong yero para sa pabahay. Kailangan din ang tulong ng mga magsasaka at mangingisda, dagdag pa ni Bb. Carvalho.
Kilala ang mga Pilipino sa katatagan. Kailangang makita ng daigdig ang nagaganap sa Tacloban City at kung paano, kahit na lubhang napinsala ng bagyo, ito nakababalik sa normal.
Ipinangako pa niya na sa pakikipagtulungan sa pamahalaan na magpapatuloy ang kanilang pagbibigay ng hanapbuhay at pabahay sa mga taong nawalan ng tahanan.
Isang malaking hamon pa rin ang pagbubukas na muli ng napinsalang mga paaralan at mga gusali ng pamahalaan upang makapaglingkod sa mga biktima sa mga susunod na panahon. Magpapatuloy ang kanilang pagtulong sa mga biktima hanggang sa 2014.
Ani Bb. Carvalho, nagpapasalamat siya sa international community sa pagpapatuloy ng tulong sa pamamagitan ng pagkain, malinis na tubig at pagkakaroon ng mga kagamitan para sa hanapbuhay at pagtatayong muli ng mga tahanan.
© China Radio International.CRI. All Rights Reserved. 16A Shijingshan Road, Beijing, China. 100040 |