|
||||||||
|
||
PANGULONG AQUINO, NANAWAGAN SA MEDIA. Sinabi ni Pangulong Benigno Simeon C. Aquino III na mayroong sapat na magagandang balita na maisasabay sa masasamang balita. Mas maganda umano kung magiging patas ang mga balitang lumalabas sa media. (PCOO Photo)
SINABI ni Pangulong Benigno Simeon C. Aquino III na higit pa sa isyung bumabalot sa South China Sea ang sandigan ng relasyon ng Pilipinas at Tsina. Sa kanyang pagharap sa Foreign Correspondents Association of the Philippines' Annual Presidential Forum, sinabi niya na maliwanag ito sa kanyang pakikipag-usap kay Pangulong Hu Jintao noong dumalaw siya sa Tsina noong 2011.
Nagkasundo umano silang dalawa na payabungin ang maraming aspeto ng relasyon. Dumarami ang mga turistang dumadalaw sa magkabilang panig ng karagatan, maganda ang kalakalan at yumayabong ang relasyon ng mga Filipino at Tsino kaya't higit pa sa isyu ng kung sino ang may poder at kung ano ang tangan.
Nagpapatuloy pa rin ang pangakong cultural assistance mula sa Tsina sa pagkakaroon ng mga gurong nagtuturo ng Mandarin, ayon sa kanyang balitang natanggap mula sa Federation of Filipino Chinese Chambers of Commerce.
Nagkita na umano sila ni Pangulong Xi Jinping sa mga nakalipas na pagkakataon bagama't walang nakatakdang pagpupulong sa pagdaraos ng APEC sa Tsina sapagkat magiging abala ang mga Tsino sa kanilang pamumuno sa pulong. Sa susunod na taon ay Pilipinas naman ang mangangasiwa sa APEC Summit meeting.
© China Radio International.CRI. All Rights Reserved. 16A Shijingshan Road, Beijing, China. 100040 |