Mas malaki ang mawawala sa Pilipinas kung 'di maipapasa ang BBL

Mas malaki ang mawawala sa Pilipinas kung 'di maipapasa ang BBL

MAS malaki ang mawawala sa Pilipinas kung hindi maipapasa ang Bangsamoro Basic Law. Ito ang sinabi ni Pangulong Benigno Simeon C. Aquino III sa kanyang talumpati sa unang anibersaryo ng paglagda sa Comprehensive Agreement on the Bangsamoro.

Ani Pangulong Aquino, ang mga mawawalan ay ang mga taong napapagitna sa kaguluhan ang maaapektuhan kasabay ng pagtatangka ng pamahalaang maibsan ang kahirapan at ang pagtatamo ng kapayapaang pangmatagalan.

Ang mga taong napabayaan at tinalikdan ng sistema at mga institusyon ang makakadama ng paglimot at masamang pagtrato kung hindi maipapasa ang Bangsamoro Basic Law.

Ito umano ang sangangdaang kinakaharap ng bansa, ang pagtatangkang magkaroon ng kapayapaan at ang pagbibilang ng mga bodybags na maglalaman ng mga mapapaslang. Madali umanong sabihin na makipagdigmaan na sapagkat ang mga nananawagan ng ganito ay nasa Luzon at Kabisayaan at malayo sa Mindanao.

Kung maipapasa ang BBL, dalawang problema ang malulutas, ang kahirapan at ang kaguluhan sa bansa. Tumagal umano ng 17 taon ang pagsusuri at negosasyon at marami nang nagbuwis ng buhay makamtan lamang ang kapayapaan.

Sa naganap sa Mamasapano, napaltan ang pagtitiwala ng mga pagdududa at galit. Ang mga puna sa BBL ay dahilan lamang ng kawalan ng pag-unawa sa panukalang batas. Tunay umanong kapayapaan ang kanyang nais makamtan sa administrasyong ito.

Sa kanyang talumpati, sinabi ni Pangulong Aquino na kailangang magkaroon ng independent convenors tulad nina Manila Archbishop Luis Antonio Cardinal Tagle, dating Chief Justice Hilario Davide at ang mangangalakal na si Jaime Augusto Zobel de Ayala. Kailangan ang tatlong ito., ani Pangulong Aquino upang mamuno sa National Peace Summit.

Kailangan umano ito upang masuri ang nilalaman ng Bangsamoro Basic Law na pinunpuna dahilan sa naganap sa Mamasapano noong Enero.