Bagong Alyansang Makabayan, nabahala sa pagbabalik ni General Purisima
BAYAN, NABABAHALA. Sinabi ni Bayan Secretary General Renato Reyes na nakababahala ang pagbabalik sa Campo Crame ni Director General Alam Purisima bukas. Magugunitang magtatapos na ang anim na buwang suspension ng dating PNP chief. Isinangkot din ang nagbitiw na pinuno ng Philippine National Police sa napalpak na operasyon ng PNP Special Action Force noong nakalipas na Enero 25. (Melo M. Acuna Photo)
NAKABABAHALA. Ito ang sinabi ni Bayan Secretary General Renato Reyes bilang reaksyon sa balitang babalik na sa serbisyo si Director General Alan Purisima matapos ang anim na buwang suspension dahil sa isang usapin. Nababahala si G. Reyes dahil sa pagkakasangkot o pagkakadawit ni General Purisima sa kontrobersyal na operasyon sa Mamasapano noong Enero 25.
Ayon kay G. Reyes, umalabas na nawawala na ang pananagutan sa mga institusyon. Sa isang statement, sinabi ng Bayan na may rekomendasyon ang PNP Board of Inquiry na alamin ang criminal at administrative liabilities ng mga opisyal na nasangkkot sa operasyon ng PNp Special Action Force na ikinasawi ng 44 na pulis, 17 Moro Islamic Liberation Force guerillas at limang sibilyan.
Inakusahan si Purisima ng pagmamando ng police operations noong Enero 25 na kinilala sa pangalang Oplan Exodus kahit pa suspendido dahil sa sinasabing anomalya sa pagkuha ng isang courier service.
Naunang sinabi ni Pangulong Aquino na kinonsulta niya ang kanyang malapit na kaibigan hinggil sa operasyon upang madakip si Zulkifli bin Hir na kilala sa pangalang Marwan.
Nais mabatid ni G. Reyes kung ano ang gagawin ni Pangulong Aquino sa pagbabalik ng kanyang kaibigang si General Purisima sa serbisyo.
Naunang binanggit ni PNP OIC Leonardo Espina na magbabalik nga sa serbisyo si General Purisima subalit mananatili sa PNP Holding Center sapagkat nagbitiw na siya sa pagiging director general.
Nangangamba si Reyes na baka maimpluwensyahan ni Purisima si Pangulong Aquino sa pagpili ng itatalagang director general sa pagbibitiw ni OIC Espina sa ika-16 ng Hulyo.
Ipinagtatanong ni G. Reyes kung hindi mababago ang sahod ni General Purisima kahit pa wala siyang trabaho.
1 2 3 4 5
