NABAHAHALA ang Simbahang Katolika sa balitang lumabas na pwersahang paalisin ang may 3,000 pamilyang apektado ni "Yolanda" sa mga sinasabing "danger zones" pagsapit ng unang araw ng Hulyo.
Sinabi ni Fr. Edu Gariguez, executive secretary ng National Secretariat for Social Action, Justice and Peace na ang mga pansamantalang tirahan ang siyang magiging kanlungan ng mga biktima sa loob ng dalawang taon samantalang naghihintay ng mga bagong tahanang itatayo ng National Housing Authority at non-government organizations.
Ipinagtataka ni Fr. Gariguez kung bakit nagbigay ng deadline ang pamahalaang-lungsod. Karamihan ng mga naninirahan ay nasa Old Road Sagkahan na tinamaan ng storm surge o daluyong noong Nobyembre 2013. Unang ibinalita ang paglilipat noong unang linggo ng Mayo subalit hindi itinuloy sa kahilingan ng mga mamamayang magdiwang muna ng kapistahan sa darating na katapusan ng Hunyo.
May 14,000 pamilya ang naninirahan sa sinasabing danger zones sa Tacloban City. MGA NANINIRAHAN SA DANGER ZONES, MAPAPALAYO SA HANAPBUHAY. Nababahala ang mga tauhan ng CBCP National Secretariat of Social Action, Justice and Peace sa nabalitang puersahang pagpapaalis sa mga naninirahan sa "danger zones" sa Tacloban City sa darating na unang araw ng Hulyo. Walang kuryente at tubig at malayo sa hanapbuhay ang mga paglilipatan sa kanila. (NASSA CBCP Photo)
Nangangamba ang mga mamamayan sa paglilipatan sapagkat walang kuryente at tubig. Malayo rin sa kanilang mga hanapbuhay ang relocation sites.
1 2 3 4 5
