Pagkakaisa, kailangan upang mapigil ang climate change
NANAWAGAN si Pangulong Benigno Simeon C. Aquino III kahapon na magkaisa ang lahat upang mapigilan ang climate change sa pamamagitan ng pangangakong pagbabawas ng green house gas emissions at magkaroon ng mas matatatag na komunidad.
Sa kanyang talumpati sa Climate Vulnerable Forum High-Level Event, sinabi ni Pangulong Aquino na ang mga debate sa kung sinong bansa ang nararapat kumilos ay nararapat mabago at matuon kung ano ang magiging kontribusyon ng bawat bansa upang gumanda ang situwasyon.
Dumalo si Pangulong Aquino sa 21st Session ng Conference of Parties o COP21 sa UN Framework Convention on Climate Change sa Paris, Francia. Ani Pangulong Aquino, mahalagang gawin ng lahat ng bansa ang magagawa at mapalawak ang mga paraan upang matugunan ang climate change. Kailangang magtangka at magsakripisyo at kung hindi ay matatalo ang lahat sa pinsala at halaga ng pagbahgong-muli.
Ang mga bansang tulad ng Pilipinas ang siyang nagpapasan ng pinsala sa pagbabago ng panahon.
Sinabi pa ng pangulo na noong humagupit si Pablo noong 2012, naghanap ng ibang pagkakakitaan ang pamahalaan para sa mga magsasaka ng niyog na lubhang napinsala.
Ginagawa ng Pilipinas ang lahat sa pagkakaroon ng pagtatanim ng mga puno at mahigpit na napigilan ang illegal logging at mga makapipinsalang gawain. May renewable energy programs na rin ang pamahalaan tulad ng solar, wind, biomass, hydro at geothermal power, dagdag pa ni Pangulong Aquino.
1 2 3 4 5
