Vice President Binay, inanyayahan si Mayor Duterte na magpasuri sa Makati
INANYAYAHAN ni Vice President Jejomar C. Binay si Davao City Mayor Rodrigo Duterte na sumailalim sa psychological at physical exam sa Makati na walang babayaran.
Sa isang pahayag, ginawa ni G. Binay ang mungkahi bilang pagmamabuting-loob kahit sa mga kalaban sa politika.
Ani G. Binay, nararapat magpatingin sa manggagamot si G. Duterte sapagkat tila nahihirapan na siya sa kampanya at naaapektuhan na ang kanyang katawan at pag-iisip.
Kailangan na rin umano ni G. Duterte ng full physical examination sapagkat si G. Duterte na mismo ang angsabing may malubhang sakit at ayaw ng madlang mapahamak ang punong-lungsod ng Davao.
Ani G. Binay, ang sinasabing psychological disorder ni G. Duterte ay maaring naging dahilan upang maging kakaiba ang kanyang tugon sa mga puna mula ng magbiro sa hinalay at pinaslang na misyonerang mula sa Australia kamakailan.
Umaasa umano si G. Binay na hindi lumala ang kalagayan ni G. Duterte.
1 2 3 4
