Pangulong Duterte, ginagawa ang lahat para sa bansa
SINABI ni Presidential Communications Secretary Martin Andanar na ginagawa ni Pangulong Duterte ang lahat upang masugpo ang droga sa bansa at hindi na makapaghintay sa mabagal na paggulong ng katarungan.
Sa isang press briefing, sinabi ni G. Andanar na isang "action man" si G. Duterte at nagnanais na masugpo ang droga, krimen at katiwalian sa pinakamadaling panahon.
Ginamit na umano ni G. Duterte ang kanyang poder bilang pangulo at batid rin niya ang limitasyon ng kanyang tanggapan at hindi kailanman makikialam sa poder ng hudikatura at karapatan ng mga mamamayan.
Hinggil sa sinasabing posibleng constitutional crisis, sinabi ni G. Andanar na isang abogado si G. Duterte at naniniwala sa "rule of law" at nagsusulong ng judicial independence. Sa kanyang panunumpa, kinilala niya at ipinangako niyang ipagtatanggol ang Saligang Batas. Noong pangalanan umano ng pangulo ang mga hukom at ipinadala sa Korte Suprema, kinikilala niya ang hurisdiksyon ng Korte Suprema sa mga huwes. Kinikilala niya ang separation of pwoers at hiniling lamang niya kay Chief Justice Lourdes Sereno na huwag nang magsimula ng isang "constitutional crisis."
Sa paglalabas ng mga pangalan ng mga hukom noong Linggo, binibugyan lamang umano ni G. Duterte ng pagkakataon ang mga binanggit na maipagtanggol ang kanilang mga sarili at liwanagin ang ulat kung sila'y walang kinalaman sa ilegal na gawain at maipaalam sa madla kung sila'y tuwirang sangkot sa krimen. Itinataya umano ni Pangulong Duterte ang kanyang karangalan at panguluhan, dagdag pa ni G. Andanar.
1 2 3 4
