Relasyon ng Pilipinas at Tsina, patuloy na gumaganda

Relasyon ng Pilipinas at Tsina, patuloy na gumaganda

RELASYON NG PILIPINAS AT TSINA, HIGIT NA GUMAGANDA. Ito ang sinabi ni Philippine Ambassador to China Chito Sta. Romana sa isang eksklusibong panayam kaninang umaga sa Quezon City. Maraming nararapat gawin, dagdag pa ni G. Sta. Romana. Malaki ang posibilidad na makarating na siya sa Beijing sa Enero ng 2017. (Melo M. Acuna)

KASUNOD ng matagumpay na pagdalaw ni Pangulong Rodrigo Duterte sa Tsina noong nakalipas na Oktubre, dumating na sa Pilipinas ang ilang delegasyon ng matataas na opisyal ng Tsina at nakipag-usap sa mga opisyal ng bansa sa larangan ng pagsasaka, kalakal at negosyo at maging sa mga napipintong mga proyektong maipatutupad ayon sa mga kasunduang nilagdaan.

Ito ang sinabi ni Philippine Ambassador to China Jose Santiago "Chito" Sta. Romana sa isang eksklusibong panayam kaninang umaga. Obligasyon niyang magkatotoo ang mga kasunduang nalagdaan sa pamamagitan ng paghahanda ng magkabilang panig at pagsasagawa ng masusing pag-aaral. Bilang Philippine Ambassador to China, sinabi ni G. Sta. Romana na matututo na ang Pilipinas sa mga leksyong idinulot ng ZTE-NBN at iba pang kontrobersyal na kasunduan.

Sinabi pa ni G. Sta. Romana na mayroon ding malalim na relasyon ang Pilipinas at Estados Unidos at marapat lamang bantayan ang mga pagbabagong ipatutupad ng nahalal na pangulong si G. Donald Trump.

Hinihintay na lamang ni G. Sta. Romana ang pormal na pagtanggap ng Tsina sa kanyang appointment bago siya magtungo sa Beijing. Umaasa siyang makababalik sa Beijing bilang Ambassador ng Pilipinas sa darating na Enero, 2017.

Mas marami pang nakatakdang pagpupulong sa larangan ng ugnayang panglabas, kalakal, pagsasaka at maging sa larangan ng gawain ng coast guard.

Ipinaliwanag niyang ang pahayag ng Tsina at Pilipinas sa pagtatapos ng pagdalaw ni Pangulong Duterte noong Oktubre ang kanyang "program of action" at gabay sa kanyang pagiging sugo ng Pilipinas.

Marapat lamang bantayan ng mga Filipino ang gagawin ni Pangulong Donald Trump sapagkat umatras na siya sa Trans Pacific Partnership na siyang economic arm ng American pivot sa Asia. Nais mabatid ni G. Sta. Romana kung ano ang magiging alternatibo ni G. Trump sa TPP.

Higit umanong makikita ang independent foreign policy ng Pilipinas sa balansyadong pakikipagkaibigan sa mga bansang tulad ng Tsina, Estados Unidos, Japan, India, Korea at iba pang bansa sa Asia at ASEAN, dagdag pa ni G. Sta. Romana.