Tradisyunal na Vin d' Honneur pinamunuan ni Pangulong Duterte
NANGAKONG muli si Pangulong Rodrigo Duterte sa tradisyunal na Vin d' Honneur sa Malacanang Palace na pupuksain ang katiwalian, kriminalidad at illegal drugs sa bansa.
Nagpasalamat si Pangulong Duterte sa mga kinatawan ng iba't ibang bansa at international organizations sa pagtitipon. Umaasa umano siyang magkakaroon ng makabuluhang pagbabago para sa Pilipinas at mga bansang may mga kinatawan sa Maynila.
Nangako rin siyang masusugpo ang rebelyon sa katimugang bahagi ng bansa. Hindi umano nagbabago ang kanyang programang ipinangako sa mga mamamayan.
Nangako rin siyang hahabulin ang mga tiwaling opisyal ng pamahalaan at dudurugin ang gulugod ng illegal drugs sa Pilipinas. Kailangan ang mga pagbabago, ani Pangulong Duterte upang madagdagan ang kalakalan, magkaroon ng mga pagawaing-bayan, madagdagan ang kita upang makatugon ang mga komunidad at mapaunlad ang social services.
Nais din niyang maghari ang matagalang kapayapaan sa Mindanao at matapos na ang paghihimagsik ng mga kalaban ng pamahalaan.
Sa pagharap sa mga hamon mula sa loob ng bansa, pinahahalagahan din ng pamahalaan ang pakikipagkaibigan at pagpapalakas ng relasyon at kasabay ng pagtuklas ng mga bagong kaibigan.
Sa pamumuno ng Pilipinas sa ASEAN, oportunidad ito na maipakita ang liderato sa pagusulong ng regional development na magbibigay halaga sa ibayong kabutihan ng mga mamamayan. Umaasa ang Pilipinas sa tulong ng iba't ibang bansa.
Dumalo sa Vin di' Honneur sina Chinese Ambassador Zhao Jianhua, US Ambassador Sung Kim at Russian Ambassador Igor Khovaev at iba pa.
1 2 3 4 5 6
