Pagpuna kay Pangulong Duterte, makatwiran
SINABI ng Human Rights Watch na kailangan pang dagdagan ang pagpuna sa Pamahalaang Duterte upang mapigil ang mga pag-abuso nito laban sa illegal drugs at iba pang mga pagpatay na nakakasama sa karumal-dumal na mga krimen.
Inilabas ng samahan ang pahayag matapos maglabas ng kanilang mga pagkabahala ang European Parliament at United Nations na kapwa pumupuna sa anti-drug campaign ng pamahalaan at sa mga hakbang upang ibalik ang parusang kamatayan.
Sa isang press statement, sinabi ng samahan na makatarungan lamang ang kanilang pahayag sa kawalan ng paggalang sa karapatang pangtao at tamang proseso. Mangangailangan pa ng dagdag na pagpuna sapagkat magpapatuloy ang mga pagpaslang, dagdag pa ng Human Rights Watch.
Magkakaroon umano ng masamang epekto ang mga paglabag na ito kasabay ng pahayag ng European Trade Commissioner Cecilia Malstrom na panganib sa duty-free treatment ng mga produktong mula sa Pilipinas na ipinagbibili sa Europa.
Sa Malacanang, sinabi naman ni Presidential Spokesperson Ernesto Abella na tila hindi nauunawaan ng iba't ibang grupo ang ginagawa ng pamahalaan upang malutas ang problema sa larangan ng kapayapaan at kaayusan sa bansa.
Lumalabas na nananakot ang mga pandaigdigang samahan, dagdag ni Ginoong Abella.
Sa pinag-isang resolusyon na lumabas sa European Parliament website, maraming isyung binanggit ang mga mambabatas hinggil sa ginawang panggigipit kay Senador Leila de Lima. Kailangan umanong magkaroon ng sapat na seguridad samantalang nakapiit at kasabay ng panawagang magkaroon ng patas na paglilitis sapagkat hindi pa napapatunayang nagkasala, pagbabasura sa lahat ng usaping may bahid politika at ang pagwawakas ng iba pang panggigipit sa mambabatas.
Nanawagan din ang parliament na magkaroon ng independent international investigation sa mga labag sa batas na pagpaslang sa pakikidigma ni Pangulong Duterte sa illegal drugs.
Idinagdag ng Malacanang na nararapat lamang kilalanin ng European Parliament ang dahilan ng pagsusuplong laban kay Senador Leila de Lima. Kinasuhan siya dahil sa krimeng kanyang nagawa at walang kinalaman ang politika, dagdag naman ni Secretary Abella.
1 2 3 4 5
