Ipininid sa Beijing nitong Sabado, Abril 27, 2019 ang Ikalawang Belt and Road Forum (BRF) for International Cooperation kung saan narating ng mga kalahok na lider ng iba't-ibang bansa ang malawakang komong palagay tungkol sa magkakasamang pagtatayo ng "Belt and Road." Ipinahayag sa porum ng mga kalahok na lider ng sampung (10) bansa ng Association of Southeast Asian Nations (ASEAN) ang kanilang opinyon at palagay sa Belt and Road Cooperation.
Sinabi ni Punong Ministro Mahathir bin Mohamad ng Malaysia na ang magkakasamang pagtatayo ng "Belt and Road" ay hindi lamang nalulutas ang mga problema sa imprastruktura at transportasyon na humahadlang sa pag-unlad ng iba't-ibang bansa, kundi napapasulong pa ang diyalogo at pagpapalitan ng iba't-ibang bansa. Ito aniya ay nakakatulong sa pagpawi sa pinag-ugatan ng mga problemang gaya ng digmaan, ekstrimismo, at terorismo na kinakaharap ng sangkatauhan. Kailangang mas mabuting maunawaan at malaman ng komunidad ng daigdig ang "Belt and Road," dagdag niya.
Ipinahayag din ni Pangulong Rodrigo Duterte ng Pilipinas na kasalukuyang isinasagawa ng kanyang bansa ang estratehiyang "Build, Build, Build." Winiwelkam aniya ng Pilipinas ang pagdaragdag ng mga bahay-kalakal na Tsino ng pamumuhunan sa Pilipinas. Sinabi rin ni Ambassador Jose Santiago Sta. Romana ng Pilipinas sa Tsina, na ang basehan sa paglahok ng Pilipinas sa BRI ay ang pambansang kapakanan.
Ipinahayag din sa porum ni Punong Ministro Lee Hsien Loong ng Singapore ang pag-asang mapapatingkad ng BRI ang konstruktibong papel sa mga aspektong tulad ng serbisyong pinansyal, pamumuhunan ng ikatlong panig, at human resources.
Salin: Li Feng