Porum hinggil sa pagtutulungang pang-media ng Tsina't ASEAN, idinaos

Idinaos nitong Martes, Mayo 14, sa Beijing ang 2019 ASEAN-China Media Cooperation Forum na may temang "Bagong Yugto, Bagong Tunguhin, at Bagong Kooperasyon." Lumahok dito ang mga kinatawan mula sa Tsina at sampung kasaping bansa ng Association of Southeast Asian Nations (ASEAN). Nagkakaisa silang ibayo pang pasusulungin ang pagtutulungan para maisakatuparan ang komong kasaganaan.

Sa kanyang talumpati, ipinahayag ni Guo Weimin, Pangalawang Direktor ng Tanggapan ng Impormasyon ng Konseho ng Estado ng Tsina, ang pag-asa ng bansa na samantalahin ng mga media organization ang Taon ng Pagpapalitan at Pagtutulungan ng Media ng Tsina't ASEAN, para mapasulong ang pag-uunawaan ng mga mamamayan ng magkabilang panig.

Si Guo Weimin

Sinabi naman ni Jose Santiago Sta. Romana, Embahador ng Pilipinas sa Tsina, na sa kasalukuyang masalimuot na situwasyong pandaigdig, napakahalaga ng pag-uunawaan at gumaganap ang mga media ng masusing papel hinggil dito. Dagdag pa niya, aktibo sa magkakasamang pagpapasulong ng Belt and Road Initiative (BRI) ang lahat ng mga kasaping bansa ng ASEAN, at responsibilidad ng mga media na ipaalam sa daigdig ang target ng nasabing inisyatiba para sa komong kasaganaan.

Si Amba. Sta. Romana

Salin: Jade
Pulido: Mac