Xi at Abdullah, bumati sa ika-45 anibersaryo ng relasyong diplomatiko ng Tsina at Malaysia

(GMT+08:00) 2019-05-31 19:01:53       CRI2019-05-31 19:01:54

Nagpadala ng mensahe sa isa't isa ngayong araw, ika-31 ng Mayo 2019, sina Pangulong Xi Jinping ng Tsina at King Sultan Abdullah ng Malaysia, bilang pagdiriwang sa ika-45 anibersaryo ng pagkakatatag ng relasyong diplomatiko ng dalawang bansa.

Sinabi ni Xi, na nitong 45 taong nakalipas, matatag ang relasyong Sino-Malay, at mabunga ang kooperasyon ng dalawang bansa. Ito aniya ay nagdudulot ng aktuwal na benepisyo sa mga mamamayan ng dalawang bansa, at nagbigay ng positibong ambag sa katatagan at kaunlaran ng rehiyong ito. Umaasa rin aniya si Xi, na sasamantalahin ng Tsina at Malaysia ang kooperasyon sa ilalim ng Belt and Road Initiative, para magkaloob ng bagong nilalaman sa komprehensibo at estratehikong partnership ng dalawang bansa, at magbigay ng bagong lakas sa pag-unlad ng rehiyong ito.

Ipinahayag naman ni Abdullah ang kasiyahan sa pag-unlad ng relasyong Malay-Sino at paglalim ng pagkakaibigan ng kani-kanilang mga mamamayan nitong 45 taong nakalipas. Umaasa aniya siyang patuloy na uunlad ang relasyong ito, at magdudulot ng mas maraming benepisyo sa mga mamamayan.

Nang araw ring iyon, nagpadala rin ng mensahe sa isa't isa sina Premyer Li Keqiang ng Tsina at Punong Ministro Mahathir Bin Mohamad ng Malaysia bilang pagdiriwang sa nabanggit na okasyon.

Salin: Liu Kai