Bangkok, Thailand—Idinaos Martes, Setyembre 10, 2019 ang ika-22 pulong ng mga ministro ng kabuhaya't kalakalan ng Association of Southeast Asian Nations (ASEAN), Tsina, Hapon at Timog Korea (10+3). Binigyang-diin sa pulong ang pangangalaga sa multilateralismo, inulit ang pagpapalakas ng integrasyon ng kabuhayang panrehiyon, at ipinangakong puspusang pasusulungin ang pagtatapos ng talastasan sa Regional Comprehensive Economic Partnership (RCEP) sa loob ng kasalukuyang taon.
Ayon sa magkakasanib na pahayag na inilabas pagkatapos ng pulong, kahit tuloy-tuloy na lumaki ang kalakalan ng ASEAN at Tsina, Hapon at Timog Korea, lumitaw ang tunguhin ng pagbagal ng kabuhayang pandaigdig, ang pag-usbong ng proteksyonismong pangkalakalan at damdamin laban sa globalisasyon ay nakaapekto sa sistema ng multilateral na kalakalan, at tumaas ang panganib at di-tiyak na elemento sa kabuhayang pandaigdig.
Muling ipinahayag ng mga kalahok na ministro na magpupunyagi para mapangalagaan ang isang bukas, inklusibo, malinaw, at walang pagtatanging sistema ng multilateral na kalakalan, na batay sa mga alituntunin.
Salin: Vera