Kuala Lumpur — Idinaos nitong Linggo, Enero 19, 2020 ang seremonya ng pagbubukas ng "Taon ng Turismong Pangkultura ng Tsina at Malaysia sa 2020." Hinggil dito, magkahiwalay na ipinadala nina Premyer Li Keqiang ng Tsina at Punong Ministro Mahathir Mohamad ng Malaysia ang mensaheng pambati sa seremonyang ito.
Ani Premyer Li, nitong ilang taong nakalipas, nananatiling malusog at matatag ang pag-unlad ng relasyong Sino-Malay. Umaasa aniya siyang sa pamamagitan ng Taon ng Turismong Pangkultura, mapapalawak ng dalawang bansa ang pagpapalitang pangkultura, mapapalalim ang kooperasyong panturismo, mapapahigpit ang pag-uunawaan ng mga mamamayan, at walang humpay na mapapasulong ang pagkakaibigan ng dalawang bansa.
Ipinahayag naman ni Mahathir ang kanyang pananalig na tiyak na pasusulungin ng nasabing aktibidad ang relasyon at pagkakaibigan ng dalawang bansa. Bumati rin siya ng Manigong Bagong Taon sa mga mamamayan ng dalawang bansa.
Salin: Li Feng