Pinoy scholars sa Beijing at Tianjin, ligtas sa nCoV

Ruth Jane Realubit ng UIBE (Ika-2 sa kaliwa)  

Ayon sa datos kaugnay ng epidemyang dulot ng novel coronavirus ngayong araw, Pebrero 1, 2019, ang Beijing may ay 156 na kumpirmadong kaso, 5 gumaling at 1 namatay.

Sa panayam ng China Media Group Filipino Service kay Ramil Santos, doctorate student mula sa BeiHang University, ngayong araw ay dinalaw ng mga opisyal ang mga international students upang alamin ang kanilang kalagayan. Nagbigay rin ang pamantasan ng ilang daily necessities gaya ng maskara, tubig at pagkain. At higit sa lahat, maagang nakuha ng mga estudyante ang kanilang monthly allowance. Ipinatutupad din sa BeiHang ang mahigpit na seguridad at ipinagbabawal ang pagpasok ng mga hindi mag-aaral.

Ayon naman kay Ruth Jane Realubit, scholar ng University of International  Business and Economics (UIBE), sinabi niyang wala pang kaso ng nCoV o pinagsusupetsahang may sakit na estudyante sa kanyang pamantasan. Ipinatutupad sa kasalukuyan ng UIBE ang mahigpit na prevention and control regulations alinsunod sa kautusan ng pamahalaan. Ayon pa kay Realubit, kinukunan sila ng temperatura dalawang beses isang araw. Hands-on aniya pa ang mga guro at opisyal ng UIBE sa pagmo-monitor ng kalagayan ng mga estudyante. Isang bagay na ipinag-aalala ni Realubit ay ang kakulangan ng mabibiling bigas, gulay at prutas sa loob ng eskwelahan dahil bawal na silang lumabas ng campus.

Ramil Santos

Samantala, sa karatig lunsod ng Tianjin, ibinahagi ni Justine Orduña, kumukuha ng Masters of International Affairs and Public Policy sa Zhou Enlai School of Government, Nankai University, malabong magbukas ang klase ngayong Pebrero. Nagbigay ang pamantasan ng temporary residence ID at tanging ang mga mayhawak nito ang maaring manatili sa campus.  Pinakamalaking concern ni Orduna ngayon ang kanyang visa na mapapaso sa Marso. Sinuguro naman ng kanyang guro na ito ay aayusin sa katapusan ng buwang ito. Naka-total lockdown din ang Nankai University gaya ng ibang universities.

Si Justine Orduña

Napag-alaman ng China Media Group na extended indefinitely o pahahabain ang Spring vacation at hindi pa tukoy ang petsa ng muling pagbubukas ng nasabing mga pamantasahan.

Ulat: Mac
Web-edit: Jade