Pangulong Tsino at Pilipino, nagpadala ng mensaheng pambati tungkol sa ika-45 anibersaryo ng pagkakatatag ng relasyong diplomatiko ng dalawang bansa

Ipinadala Martes, Hunyo 9, 2020 nina Pangulong Xi Jinping ng Tsina at Pangulong Rodrigo Duterte ng Pilipinas ang mensahe sa isa't-isa bilang pagdiriwang sa ika-45 anibersaryo ng pagkakatatag ng relasyong diplomatiko ng dalawang bansa.

Sa mensahe, tinukoy ni Xi na nitong 45 taong nakalipas sapul nang maitatag ang relasyong diplomatiko ng Tsina at Pilipinas, natamo ng kanilang relasyon ang napakalaking pag-unlad. Lalong lalo na, aniya, nitong ilang taong nakalipas, lumalalim ang pagtitiwalaang pulitikal, lumalawak ang kooperasyon ng dalawang bansa sa iba't-ibang larangan, at mabunga ang kanilang magkasamang pagtatatag ng "Belt and Road," bagay na nakakapaghatid ng aktuwal na benepisyo sa mga mamamayan ng dalawang bansa at nakakapagbigay ng positibong ambag para sa katatagan at kaunlaran ng rehiyong ito.

Ipinagdiinan pa ni Xi ang kanyang pagpapahalaga sa pag-unlad ng relasyong Sino-Pilipino. Nakahanda aniya siyang magsikap kasama ni Pangulong Duterte para mapasulong pa ang komprehensibo't estratehikong relasyong pangkooperasyon ng dalawang bansa. Nakahanda ang panig Tsino na magsikap kasama ng panig Pilipino para magkasamang labanan ang COVID-19, dagdag pa niya.

Sa kanya namang mensahe, ipinahayag ni Duterte na sapul nang maitatag ang relasyong diplomatiko ng dalawang bansa noong 1975, walang humpay na umuunlad ang kanilang relasyon. Aniya, dahil kasalukuyang kinakaharap ng kaligtasan at katatagang pandaigdig ang hamon, at unti-unting namumukod ang mga banta sa di-tradisyonal na larangang panseguridad na gaya ng COVID-19 pandemic, nagiging napakahalaga ang ibayo pang pagpapalakas ng partnership ng Pilipinas at Tsina.

Dagdag pa niya, pinahahalagahan ng panig Pilipino ang relasyon sa Tsina, at nakahanda itong magsikap kasama ng panig Tsino para walang humpay na mapalalim ang komprehensibo't estratihikong kooperasyon, at mapasulong ang kapayapaan, kaunlaran, at kasaganaan ng dalawang bansa.

Salin: Lito