Pitong marinong Pilipinong nagpositibo sa Coronavirus Disese 2019 (COVID-19) ang kasalukuyang ginagamot sa ospital ng Daishan County, lunsod ng Zhoushan, lalawigang Zhejiang sa dakong silangan ng Tsina.
Ito ang ipinahayag nitong Linggo, Setyembre 13, ng pamahalaan ng Daishan.
Ang nasabing pitong Pinoy ay mga tripulante ng Arsinoe, bapor ng Cyprus na dumadaong sa karagatang malapit sa Daishan para sa pagkukumpuni.
Ayon sa pahayag, noong Setyembre 9, ipinaalam ng adwana ng Zhoushan sa pamahalaan ng Daishan na ang naturang pitong Pilipino ang nagpositibo makaraang isailalim sa COVID-19 test.
Pagkatapos, pinagkalooban sila ng pandaigdigang makataong tulong at pinapasok sa Tsina para sa kuwarentina at panggagamot.
Samantala, ang nasabing bapor ay sumasailalim din sa kuwarentina sa isang takdang lugar.
Matatandaang nitong nagdaang Hulyo, tatlong iba pang tripulanteng Pinoy na kumpirmadong nahawahan ng COVID-19 ang ginamot sa mga ospital sa Lianyungang, lalawigang Jiangsu at Yantai, lalawigang Shandong, ayon sa pagkakasunod.
Salin: Jade
Pulido: Rhio