Sa Beijing at iba pang mga lunsod sa Tsina, daan-daan ang bilang ng mga Pilipino na nagtatrabaho bilang guro. Sila'y nagtuturo sa learning centers, elementary at high school pati sa mga pamantasan. Sa loob ng maraming taon, dahil sa mga oportunidad sa bansang ito, naakit ang mga gurong Pilipino na tanggapin ang bagong hamon at habulin ang kani-kanilang mga pangarap sa Tsina.
Si Nora Raga ay sampung taon ng guro sa Tsina. Sa kasalukuyan siya ay English teacher sa Elementary Department ng German Embassy School in Beijing. Paano niya nahanap ang dream job na ito?
Sa panayam kasama si Mac Ramos, host ng programang Mga Pinoy sa Tsina, sinabi niya ang dahilan kung bakit niya iniwan ang labing dalawang taong teaching job sa Malate Catholic School, aniya "Gusto kong maka-experience ng educational system ng ibang bansa." Isang kaibigan ang humikayat sa kanyang subuking magturo sa Tsina. 2004 dumating siya sa Guangzhou para magturo ng Ingles sa pamantasan pero dahil sa culture shock ay naging mahirap ang adjustment niya sa lunsod. Lumala pa ang sitwasyon nang hindi tupdin ng pinagtatrabahuan ang nasasaad na working hours at ang napagkayariang sweldo. Dahil dito nagdesisyon siyang tumungo ng Beijing para hanapin ang mas magandang kapalaran. Ayon kay Nora Raga "May kaba ako pero nilakasan ko ang loob ko. Hindi ako makakarating sa China kung walang (magandang oportunidad na) naghihintay sa akin."
Ingles ang itinuturo ni Nora Raga sa Elementary Department. Ang larawan ay kuha sa loob ng silid-aralan sa German Embassy School Beijing.
Isang agent ang tumulong sa kanya para makapasok sa Beijing Foreign Affairs University of Economics. Maayos ang kanyang naging sitwasyon sa pamantasan pero bagong hamon naman ang kanyang hinarap. Kulang sa motibasyon ang kanyang mga estudyante. Para sa kanila walang saysay ang pag-aaral ng Ingles. Dahil isang propesyunal na guro, hinugot ni Nora Raga ang higit idang dekadang karanasan sa loob ng klase at binago ang paraan o istilo nang pagtuturo. Di nagtagal naging masaya ang bawal klase at naging malapit siya sa kanyang mga estudyante.
Si Nora Raga kasama si Mac Ramos sa harap ng German Embassy School Beijing. Ayon kay Nora, unang kita pa lang niya sa gusaling ito, naramdaman na niyang ito ang eskwelahang gusto niyang pagturuan.
Dumating ang big break ni Gng. Raga sa tulong ng magulang ng batang tinuturuan. Inirekomenda siya sa German Embassy School in Beijing na noon ay naghahanap ng Kindergarten teacher. Wala mang karanasan, tiwala siya sa kanyang kakayahan at naging matagumpay ang aplikasyon sa international school . Sabi ni Nora Raga "answered prayer ito. Matatag siya, may system at alam ko kung paano isasagaw ang pagtuturo dito." Sampung taon na siya sa eskwelahang ito at ayon sa guro ito na ang kanyang dream job. Aniya "As a professional teacher nagkaroon ng progress ang kaalaman ko. Mas nag-grow pa ako."
Alamin ang mga pananaw ni Nora Raga hinggil sa mga usaping kinakaharap ng mga Pinoy teachers abroad sa programang Mga Pinoy sa Tsina. Sa inyong computer, i-klik ang audio plug-in sa itaas na bahagi ng artikulo. Para sa iba pang kwento ng OFWs dito sa Tsina pakinggan din ang programang ito sa Podcast, hanapin lang ang Kape't Tsaa. Para makuha ang updates ng iba pang mga programa i-Like ang Facebook page na CRI Filipino Service.
