Binuksan ngayong araw sa Tashkent, Kabisera ng Uzbekistan ang dalawang araw na Ika-12 Pulong ng mga Punong Ministro ng mga Kasaping Bansa ng Shanghai Cooperation Organization (SCO). Lumalahok sa pulong si Premyer Li Keqiang ng Tsina.
Ayon kay Nurlan Adilkhanuly, Direktor ng Kazakh Ablai khan University of International Relations and World Languages, ang naturang pulong ay hindi isang simpleng regular na pulong, kundi isang bagong starting point ng pag-unlad ng SCO. Sinabi niyang:
"Nitong nakalipas na 12 taon sapul nang itatag ang SCO, nakaranas ito ng maraming kahirapan. At nakuwestiyon din ang papel at epekto nito. Magdudulot ang pulong ito ng bagong panahon ng pag-unlad para sa SCO."
Ayon pa kay Adilkhanuly, ang nasabing pulong ay idinadaos bago ang tuluyang pag-urong ng magkasanib na hukbo ng North Atlantic Treaty Organization o NATO mula sa Afghanistan. Sa 6 na kapitbansa ng Afghanistan, 5 sa kanila ay kasaping bansa o bansang tagamasid ng SCO. Tatalakayin ng mga lider ng iba't ibang bansa ng SCO ang hinggil sa isyu ng Afghanistan, at ito ay may malaking epekto sa situwasyon ng Afghanistan sa hinaharap.
Bukod sa pagsisikap para mapahigpit at mapalakas ang kooperasyong panseguridad, unti-unting isinusulong ng SCO ang pragmatikong kooperasyon sa iba't ibang larangan. Sinabi ni Adilkhanuly na:
"Sa pulong na ito, tatalakayin ng mga kalahok ang hinggil sa mungkahing 'New Silk Road Economic Belt' na iniharap ng Tsina. Ito ay nagkakaloob ng bagong porma para sa pagsasagawa ng Tsina at mga kapitbansa ng kooperasyong may mutuwal na kapakinabangan. Ang nasabing daan ay magdudulot ng malaking interes sa mga kasaping bansa ng SCO, at ang mungkahing ito ay tiyak na kakatigan ng mga kasaping bansa. "
