Ipininid kahapon sa Mexico ang Ika-22 Taunang Pulong ng Asia-Pacific Parliamentary Forum (APPF).
Ayon sa magkasanib na pahayag ng pulong, 22 resolusyon ang pinagtibay ng mga kalahok na kinatawan. Ang nasabing mga resolusyon ay sumasaklaw sa pulitika at kapayapaan ng Asya-Pasipiko, kooperasyong pang-edukasyon at pangkultura ng Asya-Pasipiko, pagtutulunang pangkabuhaya't pangkalakalan ng Asya-Pasipiko, isyu ng mga sandatang kemikal ng Syria, prosesong pangkapayapaan ng Gitnang Silangan, Kalagayan ng Korean Peninsula, paglaban at pagpigil sa korupsyon, pagbabago ng klima, kaligtasan ng pagkain, at iba pa.
Sa kanyang talumpati sa seremonya ng pagpipinid, sinabi ni Raul Cervantes Andrade, Presidente ng Senado ng Mexico at Tagapangulo ng katatapos na pulong, na ang APPF ay nagpapasulong sa pagtutulungan ng mga parliament ng Asya-Pasipiko at nagpapasulong din ito sa kasaganaan ng rehiyon at buong daigdig.
Ipinahayag naman ni Chen Changzhi, kalahok na Pangalawang Puno ng Pirmihang Lupon ng Pambansang Kongresong Bayan (NPC) ng Tsina ang kahandaan ng NPC na mag-ambag, kasama ng mga counterpart sa Asya-Pasipiko para sa mas masagana at mas ligtas na kinabukasan ng Asya-Pasipiko.
Salin: Jade