Kaugnay ng pagkakasundo ng Pamahalaan ng Espesyal na Rehiyong Administratibo ng Hong Kong (HKSAR) at Pamahalaang Pilipino tungkol sa paglutas ng Maynila hostage incident, ipinahayag ngayong araw ni Tagapagsalita Qin Gang ng Ministring Panlabas ng Tsina na ikinasisiya ng panig Tsino ang maayos na pagkakalutas ng nasabing isyu. Aniya, patuloy at puspusang pangangalagaan ng panig Tsino ang seguridad at lehitimong karapatan at interes ng mga mamamayang Tsino.
Noong ika-23 ng Agosto ng 2010, sa sentrong panlunsod ng Maynila, hinarang ang isang bus na may lulang mahigit 20 Hong Kong tourists at ginawang hostage ang mga pasahero nito. Sa proseso ng pagliligtas ng panig pulisya ng Pilipinas sa mga hostages, napatay ang walong (8) turista, at nasugatan ang 7 iba pa.
Salin: Li Feng