Bilang sugo ni Pangulong Xi Jinping ng Tsina sa UN Global Climate Summit, nakipag-usap kahapon si Pangalawang Premyer Zhang Gaoli ng Tsina sa Pangkalahatang Kalihim ng UN na si Ban Ki-moon sa New York, Punong Himpilan ng UN. Samantala, magkasamang dumalo ang dalawang puno sa seremonya ng pagbibigay-donasyon ng Tsina sa UN ng Global Land Cover Dataset na may 30-meter resolution.
Sa pag-uusap, ipinaabot muna ni Zhang ang pagbati mula Pangulong Xi Jinping at Premyer Li Keqiang kay Pangkalahatang Kalihim Ban Ki-moon. Sinabi ni Zhang na positibo ang Tsina sa pagdaraos ng kasalukuyang summit na itinaguyod ni Ban. Aniya, pinahahalagahan ng Tsina ang pagbabago ng klima at ang pakikipagtulungan ng Tsina sa UN sa isyung ito. Ipagpapatuloy aniya ng Tsina ang pinalakas na pakikipagtulungan sa UN, at magbibigay ito ng 6 na milyong dolyares sa Kooperasyong Timog sa Timog na nakatuon sa pagbabago ng klima.
Ipinahayag ni Zhang na sa nalalapit na paggunita sa ika-70 anibersaryo ng pagkakatatag ng UN sa taong 2015, umaasa ang Tsina na ibayo pang pahihigpitin ng komunidad ng daigdig ang multilateralismo, pangangalagaan ang Karta ng UN at kaayusang pandaigdig na itinatag pagkaraan ng W.W.II. Aniya, bilang pirmihang kinatawan ng UN at pinamalaking umuunlad na bansa sa daigdig, patuloy na suportado ng Tsina ang multilateralismo, at ang pakikipagtulungan nito sa UN.
Sa panig naman ni Ban, ipinahayag din niya ang pagbati sa mga lider ng Tsina at pasasalamat sa ibinibigay na suporta mula sa Tsina. Sinabi ni Ban na hinahangaan niya ang isinagawang pagsisikap ng Tsina sa larangan ng pagbabago ng klima at hinihintay din niya ang mas malaking isasagawang ambag ng Tsina sa usaping ito sa hinaharap. Samantala, positibo rin si Ban sa masusing papel ng Tsina sa paglaban sa epidemiya ng Ebola sa Aprika at sa mga isyu ng Afghanistan at South Sudan.