Sa espesyal na pulong ng liderato ng Tsina hinggil sa malulubhang pagsabog sa Tianjin, lunsod sa baybaying-dagat sa dakong hilaga ng bansa, inulit ni Pangulong Xi Jinping ang kahalagahan ng ganap na imbestigasyon sa pangyayari at pagpapataw ng kaparusahan sa mga mananagot.
Ipinagdiinan din ng lideratong Tsino ang mga sumusunod na pangunahing gawain sa aftermath ng insidente.
Una, kailangang patuloy na hanapin ang mga nawawalang tao.
Ikalawa, buong-lakas na gagamutin ang mga sugatan.
Ikatlo, maayos na ipagpapatuloy ang paglilinis at paghawak sa mga natitirang kemikal.
Ikaapat, pahihigpitin pa ang pagmomonitor sa kalidad sa hangin, lupa at tubig.
Ikalima, buong-ingat na aalagaan ang mga sugatan, aaluin ang kamag-anakan ng mga nasawi at bibigyan sila ng kompensasyon.
Ikaanim, napapanahong isasapubliko ang mga impormasyon hinggil sa aftermath ng pangyayari.
Ikapito, iimbestigahan ang dahilan ng trahediya at paparusahan ang mananagot.
Naganap noong ika-12 ng buwang ito ang dalawang malakas na pagsabog sa isang warehouse sa Tianjin kung saan nakaimbak ang mga delikadong kemikal.
Ayon sa pinakahuling datos, 114 katao ang namatay sa pangyayari. Halos 700 katao ang ginagamot sa hospital. Samantala, libu-libong mamamayang lokal at 1,700 bahay-kalakal ang apektado.
Tagapagsalin/editor: Jade
Tagapagpulido: Mac
