BEIJING - Nakipagtagpo kahapon ng hapon sa Great Hall of the People si Pangulong Xi Jinping ng Tsina sa mga delegado ng International Conference on Asian Political Parties (ICAPP). Ang pagtatagpo ay bahagi ng kasalukuyang ginaganap na Asian Political Parties' Special Conference on the Silk Road.
Tatlong lider ang nabigyan ng pagkakataong magsalita sa pulong na kinabibilangan nina Nicos Anastasiades, Pangulo ng Cyprus, Punong Ministro Hun Sen ng Cambodia at Jose de Venecia Jr., Founding Chairman ng ICAPP at tanging kinatawan ng Pilipinas.
Sa panayam ng CRI Serbisyo Filipino, sinabi ni de Venecia na kanyang iminungkahi sa Pangulong Tsino ang pagpapalawak pa ng Silk Road Economic Belt at 21st Century Maritime Silk Road o Belt and Road Initiative. Idinagdag pa niyang sa pagdaan sa mga bansa ng Association of Southeast Asian Nations (ASEAN) na gaya ng Pilipinas at Indonesia, makakarating ang bagong Silk Road sa Australia at New Zealand. Sa pamamagitan nito, magbubukas aniya ang bagong Silk Road Corridor na aabot hanggang South America.
Ani de Venecia, ito ang magiging revival o muling pagbubukas ng Manila-Acapulco Trade na makapagpapalawig pa ng Belt and Road Initiative na iniharap ng Tsina para mapasulong ang komong kaunlaran ng iba't ibang bansa ng buong daigdig.
Ipinagdiinan ni de Venecia na patuloy niyang isusulong ang mungkahing ito para magiging multi-continental ang One Belt One Road Initiative at saka makakatulong ito sa kaunlaran ng buong mundo.
Ibinalita rin ni de Venecia na inaprubahan ng mga kasapi ng ICAPP ang lahat ng mga panukala para sa Beijing Initiative sa naganap na Standing Committee Meeting kagabi. Ang mga nilalaman nito ay nakatakdang ilahad sa seremonya ng pagtatapos ng Asian Political Parties' Special Conference on the Silk Road ngayong hapon.
Kinapanayam si Jose de Venecia, founding chairman ng ICAPP, ni Mac Ramos, reporter ng CRI Filipino Service. Larawang kinunan ika-16 ng Oktubre, 2015. (photo source: CPC International Department)
Ulat: Mac/Andrea
Edit: Rhio/Jade
