Ayon sa pinakahuling ulat, hanggang ala una ng tanghali ng Martes, Mayo 9, 35 ang namatay sa landslide na naganap sa Taining, Fujian Province, sa timog ng Tsina nitong Linggo. Samantala, isa ang nawawala pa rin.
Sa isang email message ngayon sa CRI Filipino Service, sinabi ni Consul General Julius Flores ng Consulate General ng Pilipinas sa Xiamen, Fujian, na kinumpirma ng Sanming City kung saan matatagpuan ng Taining, pinangyarihan ang kalamidad na walang apektadong Pinoy sa aksidente. Nauna rito, sa text message mula kay ConGen Flores, kinumpirma ng Fujian Public Security Department na walang apektadong Pilipino sa sakuna.
Ang landslide na naganap mga alas-5 ng umaga nitong Linggo ay dulot ng malakas na pag-ulan na nagsimula Sabado. Nabaon sa landslide ang isang gusali at pansamantalang panirahan sa construction site ng isang hydropower station.
Makaraang maganap ang kalamidad, agarang inutusan nina Pangulong Xi Jinping at Premyer Li Keqiang ng Tsina ang mga may kinalamang panig na buong sikap na hanapin ang mga nawawala, lunasan ang mga nasugatan at maayos na hawakan ang mga gawain para damayan ang mga kamag-anak ng mga nasugatan at nawawala. Hiniling din nilang pigilan ang mga secondary disaster, isagawa ang mahigpit na pagsusuri para alisin ang mga nakatagong panganib at aktuwal na pangalagaan ang kaligtasan ng buhay at ari-arian ng mga mamamayan.
Rescuers na naghahanap sa landslide site sa Taining County, Fujian Province, May 9, 2016. (Xinhua/Zhang Guojun)
Tagapagsalin: Jade
Tagapagpulido: Mac
