PINAYUHAN ng bantog na election lawyer na si Romulo Macalintal si Senador Ferdinand Romualdez Marcos, Jr. na kumandidato na lamang sa susunod na halalan sa pagka-senador sa halip na ituloy ang protesta laban kay VP Ma. Leonor "Leni" Robredo.
Napakalaking halaga ang kailangan sa paglulunsad ng protesta sapagkat maraming kailangang gawin upang mapatunayang mayroong krimeng naganap noong nakalipas na halalan.
Ginawa ni Atty. Macalintal ang mungkahi hindi bilang abogado ni Vice President Robredo bagkos ay bilang isang abogado sa halalalan sapagkat ang mga protesta ay laging walang katiyakan ang kakahinatnan.
Ani Atty. Macalintal, kung siya ang abogado ni Senador Marcos, papayuhan niya ang nakababatang Marcos na kumandidato na lamang sa 2019 elections at nagwagi naman si Gng. Robredo sa agwat na 263,473 boto kay Senador Marcos noong nakalipas na halalan.
Sa oras na may kalabasan ang protesta, nasayang na ang tatlong taon at eleksyon na naman kaya't mas mabuting sa susunod na halalan na lamang siya magtuon ng pansin, dagdag pa ni Atty. Macalintal.