Nagtalumpati Miyerkules, Hulyo 6, 2016 si Fu Ying, Punong Dalubhasa sa Pambansang Patakarang Panlabas ng Tsina sa Chatham House- Royal Institute of International Affairs, independent policy institute na nakabase sa London, Britanya. Sa kanyang talumpating pinamagatang "Pagkawala ng Kaayusan at Muling Pagtatatag ng Kaayusan," inilahad ni Fu ang paninindigan ng Tsina hinggil sa isyu ng South China Sea, at ikinumpara niya ito sa paninindigan ng Amerika.
Ayon kay Fu, hinahawakan ng Amerika ang pagkakaiba nito sa Tsina sa isyu ng South China Sea, batay sa kompetisyon sa estratehiyang heopulitikal at ang hegemonya nito ay depende sa pagkontrol sa mga pangunahing lugar sa karagatan. Samantala, para naman sa Tsina, ani Fu, ang nukleo ng nasabing isyung pandagat ay alitang panteritoryo at pansoberanya, kaya, ang pangunahing layunin ng Tsina sa South China Sea ay pangalagaan ang soberanya. Idinagdag pa ni Fu na dahil ang Tsina ay pangunahing tagapaggamit ng pandaigdig na lagusan sa nasabing karagatan, matitiyak nito ang maalwan at malayang nabigasyon doon, kasama ng ibang mga bansa sa rehiyon.
Ipinagdiinan din ni Fu na hindi kailanman maghahanap ng hegemonya ang Tsina sa rehiyon at hiniling din niya sa Amerika na makipagtulungan sa Tsina para mapangalagaan ang kapayapaan ng South China Sea.
Salin: Jade
Pulido: Rhio
