Idinaos nitong Biyernes, Oktubre 28, 2016, ng United Nations (UN) ang bukas na pulong para talakayin ang tema hinggil sa kooperasyon ng UN, Shanghai Cooperation Organization (SCO), Collective Security Treaty Organization (CSTO), at Commonwealth of Independent States (CIS), sa larangan ng pangangalaga sa kapayapaan at kaligtasan.
Sa kanyang talumpati sa pulong, sinabi ni Liu Jieyi, Pirmihang Kinatawang Tsino sa UN, na nitong ilang taong nakalipas, sa mga aspektong tulad ng pagbibigay-dagok sa terorismo, drug smuggling, transnasyonal at organisadong krimen, at pagpapasulong ng kooperasyong pangkabuhayan at pangkalakalan ng mga kasaping bansa, natamo ng SCO, CSTO at CIS ang positibong bunga. Ang mga ito aniya ay mabisang nangangalaga sa kapayapaan, katatagan, at kaunlaran ng rehiyon. Lubos itong hinahangaan ng panig Tsino, ani Liu.
Dagdag pa ni Liu, nakahanda ang panig Tsino na magsikap, kasama ng iba't-ibang panig, para walang humpay na mapasulong ang kooperasyon sa pagitan ng UN at mga rehiyonal na organisasyon at makapag-ambag sa pagtatatag ng magandang mundo na may pangmalayuang kapayapaan at komong kasaganaan.
Salin: Li Feng
