SINABI ni Atty. Sonny Matula, pangulo ng Federation of Free Workers na nabibigyan na ng pansin ang mga manggagawa ngayong panahon ni Pangulong Rodrigo Roa Duterte sa pagwawakas ng mga kalakarang mapanggipit. Ito ang kanyang pahayag sa idinaos na Tapatan sa Aristocrat Year-Ender Edition kaninang umaga.
Idinagdag pa ng pangulo ng mga manggagawa na may pagtutulungan na rin sila ng Employers Confederation of the Philippines upang higit na gumanda ang relasyon at kalagayan ng karaniwang magkatunggaling sektor sa lipunan.
Sa panig ni G. Sergio Ortiz-Luis, Jr., honorary chairman ng Employers Confederation of the Philippines, tahasan namang kontra ang kanilang samahan sa tig-lilimang buwang kontrata ng mga manggagawa na walang kaukulang seguridad sa kanilang trabaho.
Ipinaliwanag nga lamang ni G. Ortiz-Luis, Jr. na may mga pagkakataong hindi makatugon ang mga negosyante sa itinatadhana ng pamilihan tulad ng pagpapababa ng hotel rates sapagkat nakapako na ang sasahurin ng mga manggagawa.
Inihalimbawa niya ang karanasan sa Thailand noong kasagsagan ng krisis sa ekonomiya na napababa ng bansa ang hotel rates sa US$ 30 dolyar sa bawat araw subalit sa Pilipinas ay nananatili sa halagang US$ 100 dahil sa mga permanenteng manggagawa ng iba't ibang tourist-oriented establishments.
