PINALAYA ng Abu Sayyaf ang dalawang hostage na Indonesian kanina. Kinilala ang mga pinalayang sina Mohammad Nazir, 62 taong gulang at isang Robin Piter, 32 taong gulang.
Ang dalawa ay pinalaya sa pamamagitan ng mga tauhan ng Moro National Liberation Front sa Indanan, Sulu at dinala sa tahanan ni dating Sulu Vice Governor Abdusakur Tan sa Jolo. Dinala ang dalawa sa Joint Task Force Sulu upang isailalim sa medical check-up at processing kaninang pasado ala-una ng hapon.
Ang dalawa ang nalalabing mga Indones mula sa pito kataong crewmen ng Tug Boat Charles 00 na dinukot noong ika-22 ng Hunyo sa Simisa Island sa Sulu.
Ayon kay Col. Jesus A. Mananquil, Jr. commander ng Joint Task Force Sulu, ang mga hostages ay pinalaya dahil sa walang humpay na operasyon ng Armed Forces of the Philippines at sa pamamagitan ng mga tumulong na mapalaya ang dalawa.
Dinala ang dalawa sa Zamboanga City at ibibigay na sa mga opisyal na Indones sa Western Mindanao Command ng Armed Forces of the Philippines.