Inilabas Lunes, Hunyo 3, 2019 ng Kagawaran ng Tesorarya ng Amerika ang pahayag hinggil sa white paper ng paninindigan ng Tsina sa pagsasangguniang pangkabuhaya't pangkalakalan sa Amerika. Kaugnay nito, ipinahayag Martes ng tagapagsalita ng Ministri ng Komersyo ng Tsina na sa kabila ng mga multilateral na alituntunin ng kalakalan, madalas na isinasagawa ng panig Amerikano ang mga hakbangin ng unilateralismo at proteksyonismo, sa katuwiran ng trade deficit. Anang tagapagsalita, inilunsad din ng Amerika ang alitan sa kabuhaya't kalakalan laban sa Tsina, at sapilitang ipinataw sa Tsina ang sariling kahilingan sa kapakanan, sa proseso ng pagsasangguniang pangkabuhaya't pangkalakalan. Ito aniya ay klasikal na trade hegemonism. Anito pa, ang kilos ng panig Amerikano ay nagbunga ng kapinsalaan sa dalawang bansa, maging ng buong daigdig, at ang may ganap na kagagawan nito ay ang panig Amerikano.
Dagdag ng nasabing tagapagsalita, sa mula't mula pa'y pinapasulong ng panig Tsino ang trade talks sa Amerika, batay sa pinakamalaking pasensya at katapatan. Walang batayan aniya ang pagbatikos ng Amerika sa pag-urong ng paninindigan ng Tsina sa pagsasanggunian. Umaasa aniya ang panig Tsino na itatakwil ng panig Amerikano ang maling kilos nito; at batay sa diwa ng paggagalangan, pagkakapantay at mutuwal na kapakinabangan, kokontrolin ang alitan, palalakasin ang kooperasyon, at pangangalagaan, kasama ng panig Tsino, ang malusog at matatag na pag-unlad ng relasyong pangkabuhaya't pangkalakalan ng kapuwa panig.
Salin: Vera
