Ibinigay ngayong araw, Huwebes, ika-6 ng Hunyo 2019, sa Beijing ng Ministry of Industry and Information Technology ng Tsina ang mga 5G commercial-use license sa unang pangkat ng 4 na kompanyang kinabibilangan ng China Telecom, China Mobile, China Unicom, at China Broadcasting Network. Ito ay palatandaan ng pagsisimula ng paggamit na komersyal ng 5th generation telecommunication technology sa Tsina. Magdudulot ito ng maraming bagong pagkakataon sa bansa, magpapasulong sa pagbabago ng mga industriya, at magbibigay ng mga bagong serbisyo sa pamumuhay ng mga mamamayan.
Sa kasalukuyan, pinalalaganap sa iba't ibang bansa ng daigdig ang paggamit na komersyal ng 5G. Kabilang dito, medyo hinog ang mga kompanyang Tsino sa mga teknolohiya at produkto sa aspektong ito. Halimbawa, ipinagkaloob ng Huawei Technologies Co. Ltd. ng Tsina ang mga teknolohiya at kagamitan sa serbisyo ng 5G na sinimulan kamakailan sa 6 na lunsod ng Britanya.
Samantala, malalim na lumahok naman sa pagsubok ng paggamit ng 5G sa Tsina ang mga kompanyang dayuhan, na gaya ng Nokia, Ericsson, Qualcomm, Intel, at iba pa. Kasama ng mga kompanyang Tsino, nagbigay sila ng ambag para sa pag-unlad ng 5G sa bansa.
Ang paggamit na komersyal ng 5G ay magbibigay ng bagong sigla sa paglaki ng kabuhayan sa buong mundo. Halimbawa, ayon sa pag-aaral, mula 2020 hanggang 2025, lilikha ito sa Tsina ng pamilihan ng 5G na may 430 milyong magagamit, at magdudulot din ng 10.6 trilyong yuan na direktang halaga ng kabuhayan at mahigit 3 milyong trabaho.
Ang pagpapaunlad ng 5G ay nangangailangan ng kooperasyon, at ang mga pagkakataong dulot ng 5G ay dapat itamasa ng lahat. Nakahanda ang mga kompanyang Tsino na lumahok sa konstruksyon ng imprastruktura para sa 5G sa iba't ibang bansa, at mainit ding tinatanggap ng Tsina ang paglahok ng mga kompanya at puhunang dayuhan sa konstruksyon ng 5G network at pagpapalaganap ng paggamit ng 5G sa bansa. Ang pagbubukas at magkakasamang pagtatamasa ay dapat maging inspirasyon ng 5G sa pag-unlad ng siyensiya at teknolohiya.
Salin: Liu Kai
