Inilabas kahapon, Miyerkules, ika-7 ng Agosto 2019, ng Tsina ang pambansang pamantayan hinggil sa serbisyo ng pag-aalaga sa mga maykapansanan sa edad na puwedeng magtrabaho: ibig sabihin mula 16 hanggang 60 taong gulang. Paiiralin ang pamantayang ito sa unang araw ng susunod na taon.
Ayon kay Feng Shanwei, mananaliksik ng China Disabled Persons' Federation, nauna rito, ang mga serbisyo ng bansa para sa mga maykapansanan ay, pangunahin na, nakatuon sa mga taong nasa edad na 16 pababa at 60 pataas, at ang naturang pamantayan ay unang dokumento hinggil sa serbisyo sa mga maykapansanan sa edad na puwedeng magtrabaho. Ang pangunahing layunin nito aniya ay bigyan ng serbisyo ang mga maykapansanan sa aspekto ng mga saligang pangangailangan sa buhay, at tulungan sila para sa pagpapalakas ng kakayahan sa pag-aalaga sa sariling buhay, at pagtamo ng kahusayan sa paghahanapbuhay.
Salin: Liu Kai