Sa paanyaya ng panig Amerikano, nakatakdang lumisan ngayong araw ng Beijing papuntang Amerika ang delegasyong Tsino para sa talastasan hinggil sa isyung pangkabuhaya't pangkalakalan ng dalawang bansa. Ang biyahe ng delegasyong pinamumunuan ni Liao Min, Pangalawang Ministro ng Pinansya ng Tsina ay paghahanda para sa Ika-13 Round ng Talastasang Pangkabuhaya't Pangkalakalan sa Mataas na Antas ng dalawang bansa, na naka-iskedyul na ganapin sa Washington D.C. sa darating na Oktubre.
Dalawang linggo ang nakakaraan, umayon ang Tsina't Amerika na idaos ang ika-13 round ng talastasan. Sapul noon, pinapanatili ng magkabilang panig ang mahigpit at mabisang komunikasyon, at gumawa ng konkretong hakbang para mapahupa ang alitang pangkalakalan. Kabilang dito, nanguna ang Tsina sa pagpapalabas ng listahan ng 16 uri ng produktong Amerikano na ililibre sa karagdagang taripa. Bilang tugon, ini-tweet ni Pangulong Donald Trump na ipagpapaliban niya ang pagpapataw ng karagdagang taripa sa 250 bilyong dolyares na panindang Tsino, mula Oktubre 1 sa Oktubre 15.
Sa kasalukuyan, sinimulan na ng mga kompanyang Tsino ang pagtatanong hinggil sa presyo ng pag-aangkat ng mga produktong Amerikano na gaya ng soy bean at karne ng baboy. Nakikita rito ang kabutihang-loob at katapatan ng panig Tsino sa paglutas sa alitang pangkalakalan. Samantala, kailangan ding samantalahin ng panig Amerikano ang magandang pagkakataong ito at taglayin ang pragmatikong pakikitungo, para makalikha ng mainam na kondisyon para sa pagkakaroon ng substansyal na resulta ng bagong round ng talastasang pangkalakalan ng dalawang bansa. Makakabuti ito hindi lamang sa Tsina't Amerika, kundi sa buong daigdig.
Salin: Jade
Pulido: Rhio