Bilang pagdiriwang sa Pambansang Araw at ika-70 anibersaryo ng pagkakatatag ng Republika ng Bayan ng Tsina (PRC) na natapat nitong Martes, Oktubre 1, iba't ibang aktibidad na kinabibilangan ng maringal na pagtitipun-tipon at gala ang idinaos maghapon kahapon sa Tian'anmen Square, Beijing, kabisera ng bansa.
Masasabing isang hakbang na naging mas malapit ang Tsina sa pagsasakatuparan ng dakilang adhikain ng muling pag-ahon ng nasyong Tsino. Gayunpaman, alam na alam din ng mga Tsino na nasa unang yugto ng sosyalismo pa rin ang bansa, at nananatili pa rin itong pinakamalaking umuunlad na bansa sa daigdig. Kasabay nito, kinakaharap din ng Tsina ang mga di-tiyak na kalagayan na gaya ng proteksyonismo at unilateralismo, at pagbaba ng kabuhayang pandaigdig. Bilang tugon, tulad ng sinabi ni Pangulong Xi Jinping, ang pagkakaisa ay nagsisilbing napakahalagang garantiya para mapagtagumpayan ng mga mamamayang Tsino ang lahat ng panganib at hamon sa landas ng pag-unlad.
Ayon sa isang artikulo na inilabas sa New York Times noong katapusan ng 2018, sinabi nitong "nagsisimula pa lamang ang hakbang ng pag-usad ng Tsina." Nitong 70 taong nakalipas, maraming himalang pangkaunlaran ang nilikha ng masisipag na Tsino. Sa hinaharap, tiyak silang lilikha ng mas maraming himala para sa buong mundo.
Salin: Jade
Pulido: Mac
