Beijing — Sa kanyang pakikipagtagpo nitong Biyernes, Disyembre 13, 2019 sa kanyang Micronesian counterpart na si David W. Panuelo, ipinagdiinan ni Pangulong Xi Jinping ng Tsina, na lubos na pinahahalagahan ng Tsina ang relasyon sa Micronesia. Nakahanda aniya ang Tsina na magsikap kasama ng Micronesia para mapasulong pa ang relasyon ng dalawang bansa at makapaghatid ng mas maraming benepisyo sa kanilang mga mamamayan.
Hinahangaan ni Xi ang ginagawang pagsisikap ni Panuelo sa pagpapaunlad ng relasyon sa Tsina at kanyang buong tatag na pananangan sa prinsipyong "Isang Tsina." Tinukoy din niya na iginigiit ng Tsina ang pagtahak sa landas ng mapayapang pag-unlad, at buong tinding tinututulan ang unilateralismo at hegemonya.
Bumati naman si Panuelo sa ika-70 anibersaryo ng pagkakatatag ng Republika ng Bayan ng Tsina. Aniya, ang kooperasyon ng Micronesia at Tsina ay nakakapaghatid ng aktuwal na benepisyo sa dalawang bansa at kanilang mga mamamayan. Umaasa aniya siyang ibayo pang mapapalawak ng dalawang bansa ang kooperasyon sa mga larangang gaya ng kabuhayan at kalakalan, konstruksyon ng imprastruktura, agrikultura, at edukasyon. Buong tatag na igigiit ng kanyang bansa ang patakarang "Isang Tsina," dagdag niya.
Salin: Li Feng
