Beijing — Sa kanyang pakikipagtagpo nitong Biyernes, Disyembre 13, 2019 kay David W. Panuelo, dumadalaw na Presidente ng Federated States of Micronesia, ipinahayag ni Premyer Li Keqiang ng Tsina, na ang kasalukuyang taon ay ika-30 anibersaryo ng pagkakatatag ng relasyong diplomatiko ng Tsina at Micronesia. Nakahanda aniya ang Tsina na sa pundasyon ng paggagalangan sa isa't-isa at pagkakapantay-pantay, magsikap kasama ng Micronesia para mapasulong pa ang komprehensibo't estratehikong partnership ng dalawang bansa.
Ipinahayag naman ni Panuelo na natamo ng relasyon ng Micronesia at Tsina ang napakalaking pag-unlad. Pinahahalagahan aniya ng kanyang bansa ang pagpapaunlad ng relasyon sa Tsina, at igigiit ang patakarang "Isang Tsina." Lubos na hinahangaan ng kanyang bansa ang ginagawang ambag ng panig Tsino sa pagharap sa pagbabago ng klima, at nakahanda itong palakasin ang pakikipagkooperasyon sa panig Tsino sa ilalim ng balangkas ng United Nations (UN), dagdag pa niya.
Salin: Li Feng