Sa news briefing ng Tanggapan ng Impormasyon ng Konseho ng Estado ng Tsina nitong Martes, Enero 21, 2020, isinalaysay ni Qian Keming, Pangalawang Ministro ng Komersyo ng Tsina, na noong 2019, nanatiling matatag sa kabuuan ang takbo ng komersyo ng Tsina, at lumaki ng 5.8% ang paggamit ng puhunang dayuhan sa buong taon kumpara sa gayon ding panahon ng tinalikdang taon. Ito ay nanguna sa mga umuunlad na bansa, at pumangalawa sa buong mundo, dagdag niya.
Saad ni Qian, noong 2019, 941.5 bilyong yuan RMB ang puhunang dayuhan na aktuwal na ginamit ng Tsina sa buong taon, at nananatiling ikalawang pinakamalaking bansang pinupuntahan ng puhunang dayuhan sa buong mundo ang bansa.
Ayon naman sa salaysay ni Zong Changqing, Direktor ng Departamento ng Puhunang Dayuhan ng naturang ministri, noong isang taon, magkahiwalay na lumaki ng 36% at 40.1% ang pamumuhunan sa Tsina ng mga bansa sa kahabaan ng Belt and Road at mga bansa ng Association of Southeast Asian Nations (ASEAN), ayon sa pagkakasunod.
Salin: Vera