Tinukoy nitong Martes, Pebrero 25, 2020 ni Zhao Lijian, Tagapagsalita ng Ministring Panlabas ng Tsina, na sa katwiran ng pambansang seguridad, inimbento ng ilang opisyal ng Amerika ang bintang na umano'y pagnanakaw ng panig Tsino ng mga bunga ng siyensiya at pananaliksik ng Amerika, sa pamamagitan ng kooperasyong pansiyensiya't panteknolohiya at pagpapalitan ng mga talento. Aniya, may lihim na tangka rito ang panig Amerikano.
Saad ni Zhao, hinimok ng panig Tsino ang ilang Amerikanong opisyal na bitawan na ang lipas sa modang kaisipan ng Cold war at zero-sum game, tumpak na tingnan at pangalagaan ang pagpapalitan at pagtutulungan ng dalawang bansa sa larangan ng siyensiya, teknolohiya at people-to-people interaction, at gawin ang mas marami para sa pagpapahigpit ng pagtitiwalaan at pagtutulungan ng kapuwa panig.
Diin ni Zhao, ang tagumpay ng Tsina sa siyensiya't teknolohiya ay ibinunga ng katalinuhan at pagsisikap ng mga mamamayang Tsino. Ipinakikita ng datos na mula noong 2009 hanggang 2019, inilabas ng mga siyentipikong Tsino ang 2.6 milyong artikulo sa mga pahayagang pandaigdig, at pumangalawa ito sa buong mundo.
Salin: Vera
