Sa news briefing nitong Linggo, Abril 26, 2020, isinalaysay ni Li Xingqian, Puno ng Departamento ng Kalakalang Panlabas ng Ministri ng Komersyo ng Tsina, na kahit mabigat pa rin ang tungkulin ng pagpigil at pagkontrol sa COVID-19 pandemic sa loob ng bansa, palagiang ipinagkakaloob ng pamahalaang Tsino ang suporta't tulong sa komunidad ng daigdig, sa abot ng makakaya, sa pamamagitan ng iba't ibang paraan at tsanel.
Diin niya, hindi kailanman hinadlangan ng Tsina ang pagluluwas ng mga materyal para sa paglaban sa epidemiya.
Ibinibigay aniya ng Tsina ang ginhawa at suporta sa pagbili ng iba't ibang bansa ng mga kaukulang materyal.
Ayon sa datos, noong Abril 24, iniluwas ng Tsina ang 1.06 bilyong maskara, at ang datos na ito ay lumaki ng 3.7 ulit kumpara noong Marso 31.
Hanggang Abril 25, nilagdaan ng 74 na bansa't rehiyon at 6 na organisasyong pandaigdig, kasama ng Tsina ang kontratang komersyal sa pagbili ng 192 pangkat ng mga materyal na medikal, at ang lahat ng mga ito ay nagkakahalaga ng 1.41 bilyong dolyares.
Isinalaysay pa ni Li na inilabas din ng mga kaukulang departamento ng bansa ang mga proklamasyon, upang pag-ibayuhin ang pagsusuperbisa't pangangasiwa sa pagluluwas ng mga materyal na medikal at mga maskarang hindi para sa gamit na medikal.
Salin: Vera
