Muling hinimok nitong Lunes, Agosto 17, 2020 ni Zhao Lijian, Tagapagsalita ng Ministring Panlabas ng Tsina, ang panig Kanadyano na mataimtim na pakitunguhan ang solemnang paninindigan at pagkabahala ng panig Tsino sa kaso ni Meng Wanzhou, Chief Financial Officer (CFO) ng Huawei Technologies Co. Ltd, agarang palayain si Meng, at pabalikin siya sa Tsina nang mapayapa.
Ayon sa mga isinapublikong impormasyon hanggang ngayon, sa proseso ng pagpaplano at pagsasagawa ng pag-aresto kay Meng, ang mga awtoridad ng batas ng Kanada ay pinaghihinalaang lumabag sa regulasyon at nagmalabis sa mga prosedyur. Ang mga aksyong ito ay kinabibilangan ng pakikipagsabwatan sa Federal Bureau of Investigation (FBI) sa pag-aaresto kay Meng, tikis na pagpigil sa Vancouver International Airport, pagsasagawa ng ilegal na paghahanap at pag-iimbestiga kay Meng at iba pa.
Paninindigan ng grupo ng mga abugado ni Meng na dapat ilabas ng hukuman ng Kadana ang mas maraming ebidensyang may kinalaman sa kasong ito.
Kaugnay nito, saad ni Zhao, palagi at malinaw ang paninindigan ng panig Tsino sa kaso ni Meng Wanzhou. Ang mga inilantad na ebidensya ay lubos na nagpapatunay na nagmalabis ang Amerika at Kanada sa bilateral extradition treaty, at isinagawa ang mga sapilitang hakbangin sa mamamayang Tsino, bagay na malubhang lumalapastangan sa lehitimong karapatan at kapakanan ng mamamayang Tsino.
Diin niya, buong tatag ang determinasyon ng pamahalaang Tsino sa pangangalaga sa lehitimong karapatan at kapakanan ng mga mamamayan at kompanyang Tsino. Samantala, kinakatigan din nito ang pangangalaga ng mga kaukulang bahay-kalakal at indibiduwal sa sariling karapatan at kapakanan, sa pamamagitan ng batas.
Salin: Vera
