|
||||||||
|
||
Sa gawing Hilagang Silangan ng Beijing ay may isang bundok na kung tawagin ay "Xiang Shan," na nangangahulugang "Mahalimuyak na Bundok." Ito ang aking tinungo kamakailan sa kasagsagan ng taglamig.
Kapansin-pansing, kahit na mas mababa na sa sero ang temperatura, marami pa ring mga Tsino ang naglalakas-loob na pumunta sa bundok na ito dahil sa taglay nitong natural na kagandahan at mga makasaysayang gusali.
Sa paanan pa lamang ng bundok ay maaamoy mo na ang sariwa at mabangong hangin na humahalina sa mga taong nais itong akyatin.
Kasabay ang aking asawa, habol hininga kong binuno ang pag-akyat ng Xiang Shan. Ilang beses din akong tumigil dahil sa sobrang pagod.
Sa aking pag-akyat, nadaanan ko ang mga lumang gusaling itinayo bilang templo, pahingahan, at silid-aralan ng mga emperador ng Dinastiyang Ming (1368-1644) at Dinastiyang Qing ng Tsina (1644-1911).
Nariyan din ang mga nagsisipag-awitang mang-aakyat, upang hindi nila maramdaman ang pagod ng mga binti sa pagpanik.
Pagkatapos ng 3 oras na nakakahapong pag-akyat, narating ko ang tuktok ng bundok, at doon ay nalaman ko na ang lahat ng hirap na aking pinagdaanan sa aking pag-akyat ay sulit.
Sa tuktok ay nasilayan ko ang napakagandang paglubog ng araw habang dumadampi sa aking mukha ang malamig at mabangong hangin ng kanayunan.
(Pix 12)
Sa aming pagpanaog ng bundok, sumakay naman kami ng isang cable car: isang kasiya-siayng paraan ng pagbaba sa Xiang Shan.
© China Radio International.CRI. All Rights Reserved. 16A Shijingshan Road, Beijing, China. 100040 |